Nagaland : Kohima-ah tui hnianghnara in tur a awm lo

Nagaland khawpui Kohima chuan tui in tur lamah harsatna tawkin, hetiang harsatna an tawh chhan hi sik leh sa inthlak danglam avanga khawpui chhung tui lakna a kangchah vang niin thuneitute chuan an sawi.

Public Health Engineering Department (PHED), Executive Engineer urban division chuan khawpui tan an tui lakna chu sik leh sa inthlak danglamin a nghawng thu sawiin, heng avang hian tui hna a ṭha lo hle niin a sawi. EE chuan mipuite chu he hun harsa tak an tawh mekah hian ṭanrualpuiah sawmin, an hriatthiamna a ngen nghal bawk.

PHED thuchhuah hian khuarel hmanga tui insiam ṭhin chu an tui lakna hnar ber a nih thu leh, sik leh sa inthlak danglam chak lutuk vangin a hma angin tui hna a ṭha lo niin an tarlang. Mipuite tan theihtawp an chhuah zel dawn tih sawiin, hemi atan hian mipuite thlawpna chu an mamawh hle niin an sawi bawk.