Manipur : Meitei-in an chhungte bo hruai kir leh turin ngen

Meitei chhungkaw 31 chuan Press Club of India, Delhi-ah thuthar thehdarhtute nen inkawmna hun an neihah buaina avanga an chhung leh khat, tun thlenga an awmna chin la hriat lohte zawnpui turin sorkar an ngen. Mibo chhungte hi Meitei pawl hrang hrang- Delhi Meitei Coordinating Committee, Global Manipur Federation leh Meitei Yaipha Lup-te'n an ṭawiawm a ni.

Meitei chhungkuate hian sorkar chu an chhungte hi an thi emaw an la dam emaw pawh ni se an hnena hruai kir leh turin an ngen a ni. Nikum May 3-a buaina a chhuah aṭanga vawiin thleng hian Meitei mi 31 chu an awmna chin hriat lohin an bo mek a ni. Meitei chhungkuate thuchhuah siamah hian sorkar laipui leh Manipur sorkar bakah Kuki hnam thlengin an chhungte bo hruai kir an nih theih nana pui turin an ngen.

KCAM-in CM Biren Singh thusawi an chhang let

Manipur chief minister N Biren Singh chuan tunhnaia thu a sawinaah an state chhungah khaw thar 996 a awm niin a sawi a, heng khaw din tharte hi Myanmar aṭanga raltlante awmna atana din ni anga ngaihbel theih tur zawnga a sawi chu Kuki Chiefs Association Manipur (KCAM) chuan na takin an chhang let.

KCAM chuan Chief Minister thusawi chu ṭanchhan mumal nei lo leh finfiahna mumal awm lo a ni tih an sawi. KCAM President Secretary (External) Letkhosei Mare chuan CM thusawi chu Kuki-te hnam chin dan leh nihphung zah lohna a nih thu sawiin Kuki hnam chindan phungah chuan an ram chhungah khaw thar an din mai ṭhin a ni, a ti. Kuki hnam chin dan phung pawh hre lo leh ngaihsak loah puhin, hmasang aṭanga Kuki hnamte'n an lo chin dan ṭhan CM-in a hriat loh avangin an inkar a zauh belh phah sawt dawn niin a sawi bawk.

Finfiahna mumal awm lo hmanga thusawi ringawt ṭhin ai chuan sorkar chuan chhui chianna nei hmasa ṭhin se an duh thu KCAM chuan an tarlang tel bawk. Thudik tawk lo theh darh hian hnam pahnih inkara boruak ṭha lo awm sa chu a tihchhiat belh theih a ni, an ti. Manipur-in harsatna an tawh mek tihziaawm a nih theih nan inbiakna leh inhriatthiam tawnna a pawimawh thu sawiin, chutiang ni loa a ṭhen hrang thei zawnga thu sawi awm ṭhin chuan hnam pahnih inkara khi awm chu a tihzauh belh ṭhin niin an tarlang.