AMCH-in Covid vaccine leh lungphuchawla thihnain inzawmna a nei em tih an zir chiang dawn

Assam Medical College and Hospital (AMCH), Dibrugarh chuan COVID vaccine leh lungphuchawla thihna hian inzawmna a nei em tih an zir chiang dawn tih an sawi. Zir chiang tur team-te chuan mipui hriat turin thudik tak hai lan ngei an tum thu sawiin, Covid vaccine chungchanga rinhlehna awmte chu hriat chian an tum thu an tarlang.

Covid vaccine hi daktawr panga; Dr Mriganka Shekhar Chaliha, Dr Srimanta Madhav Barua, Dr Pranami Bora, Dr Anis Hazra leh Dr Shyamjit Laxman te'n an zir chiang dawn a ni. Zir chianna an neihah hian vaccine chuan lungphuchawla awm theihna a thlen thei em tih chhui chian a ni ang. Hemi tur atan hian vaccine lak hnua lungphuchawl avanga thihna thleng leh an taksa hriselnain a hma a phak loh dan enfiah nan data lak khawm a ni ang a, chumi hmang chuan zir chianna neih a ni ang.

Dr Mriganka Shekhar Chaliha chuan tunhnaia lungphuchawl leh lung lam natna tam lutuk chu Covid-19 nge Covid vaccine vang zawk tih mipuite rilruah zawhna a lian hle tih sawiin, heng avang hian zir chianna hi kalpui tum an nih thu a sawi. Zir chianna nei tur team hian enchhinna chi hrang hrang- ECG, ECO, HSCRP leh Cardiac MRI hmangin Covid vei leh Covid vaccine late chu an zir chiang dawn a ni.

Tun hnai mai khan Covid vaccine siamtu company pakhat, AstraZeneca chuan India tana an vaccine siam chhuah, Covishield leh Europe tana vaccine an siam Vaxzevria chuan Thrombosis Thrombocytopenia Syndrome (TTS) a thlen thei tih an pawm a, mahse, chu erawh mi tlemte zingah a ni thung niin an sawi.