Meghalaya : Petrol bomb hmangin CRPF camp leh sorkar lirthei bei leh

Central Reserve Police Force (CRPF) Mawlai camp leh Meghalaya directorate of water resources lirthei chu petrol bomb hmanga beih leh a ni. Heng inbeihna hi Shillong a thleng ve ve niin a titu hriat an la ni lo.

CRPF camp hi Nilaini zana beih niin Directorate of water resource lirthei beih hi Ningani zana thleng a ni thung a, lirthei hi a chhe nasa hle nia tarlan a ni. Tun hnaiah Meghalaya chhungah petrol bomb hmanga inbeihna hi a hluar hle a, Shillong-ah April 3 aṭanga chhiarin hetianga inbeihna hi a thlen ṭum riatna a ni. Sorkar lirthei bakah sorkar pisate pawh beih zingah hian an tel.

Police chuan heng inbeihna hi CCTV awm lohna hmuna thleng a ni deuh zel tih tarlangin, a titu leh an tih chhan chiang taka hriat ni lo mah se, zirlai pawl hruaitu ṭhenkhat man tawk an awm vanga beih letna a nih an rin thu an sawi. Meghalaya sorkar chuan petrol bomb hmanga inbeihna hi a hluar chhoh zel avangin department zawng zawng chu an pisa leh lirthei veng uluk lehzual turin hriattirna a lo tichhuak tawh a ni.