Manipur : Imphal East district-ah Kuki-Zo MLA 10-te lim an hal

Manipur-a Pangei Yangdog, Imphal East district-ah Kuki-Zo MLA 10-te lim chu mipui lungawi lote'n an hal. Manipur buaina chhuah ṭan ni champhaah PYAL, Thougei Pangei Yangdong, PYYDA leh WWA Pangei-te chuan lungawi lohna lantirin Kuki-Zo MLA te lim hi an hal a ni.

Mipui pung khawmte chuan Kuki-Zo MLA te hian an hnathawh tur dik tak kum khat chhung thawk tawh lo mah se, sorkar sum bawm aṭangin hlawh an la reng tho niin an sawi. MLA anga an hamṭhatna la reng chungin an thawh tur ang an thawk lo tih sawiin, mi ṭhenkhat chuan Kuki MLA-te chu buaina chawk chhuaktu ang hialah an puh bawk.

Meitei mipui pung khawmte chuan state sorkar laka an lungawi lohna dang tarlangin, Manipur tlang ram leh Imphal phairuamah dan leh thupek inang khata kalpui loah an puh. Meitei ṭhalai tam takin an khaw hum nan ralthuam an lek a ngai chu pawi an ti a, Manipur sorkar chu remna leh muanna a awm thuai theih nan hma la turin an ngen bawk a ni.

Kangchup-Leimakhong-a Manipur force dah Kuki Inpi-in duh lo

Manipur sorkarin buaina chhuahna hmun pakhat, Kangchup-Leimakhong chheh vela Manipur force-te dah a tumna chu Kuki Inpi, South West Sadar Hills chuan an duh lo tih an tarlang.

Thangkhup Doungel, General Secretary chuan Manipur state force-te Kangchup-Leimakhong hmuna dah tumna awm chu an duh lo tih sawiin, helaia chengte tan state sipaite chu rin ngam an ni lo a, a bikin Indian Reserve Battalion (IRB) leh helaia chengte inkar chu a ṭha lo hle tih a sawi. Doungel chuan Assam Rifles leh central force te'n hna ṭha taka an thawh laia state sipai dah belh tumna awm chu thil ṭul lo tak a ni tiin, Kuki Inpi chuan an dodal tlat dawn tih a sawi.

Doungel chuan Kuki Inpi-te'n state sipai dah belh an duh loh thu an sawi hian ngaih pawimawh a hlawh loh chuan thil ṭha lo zawk a thlen a hlauhawm niin a sawi. State sorkar pawh vaukhan nghalin, Kuki Inpi-te duhdan kalha state sipaite dah luih an nih a, state sipaite chungah harsatna a thleng a nih pawhin state sorkar mawhphurhna a ni ang tiin a sawi bawk.