Chakma-Hajong te Assam-a sawn tum ADSC-in an duh lo

Assam-a Autonomous State Demand Committee (ASDC) chuan Chakma leh Hajong hnamte Arunachal aṭanga Assam lama sawn tumna awm chu ṭha lo an tih thu an sawi. ASDC hian Karbi Anglong district lama Chakma leh Hajong-te sawn an nih chuan helaia cheng hnamte chu a tlem zawk an ni thei dawn niin an sawi.

Jotson Bey, ASDC general secretary chuan hnam pahnihte sawn tumna an duh loh thu hi Assam Chief Minsiter pawh an sawipui tawh tih a sawi. Jotson chuan Karbi Anglong chu Sixth Schedule hnuaia Tribal tana reserved a nih ang ngeiin hmun dang aṭanga rawn pem lutte dahna hmun a nih loh a beisei tih a sawi bawk.

ASDC bakah hian KSA leh Karbi Nimso Chingthur Asong (KNCA) chuan Chakma leh Hajong hnamte Assam lama sawn luh tumna awm chu an dodal ve bawk. Chakma leh Hajong nuai 5 chuang Karbi Anglong lama dah an nih chuan helaia cheng hnam inpawlhsawp dan a tibuai thei dawn niin Jotson Bey chuan a sawi a, Borlangpher area-a Chakma lo awm sate chu kum 1951 hmaa awm an nih loh chuan ram leilung fa anga ngaih theih an nih loh thu leh, an rawn kalna lama thawn kir leh an ngaih thu a sawi.