Assam : Haflong leh Silchar inkar kawngpuiah lirthei lian tlan phal lo

Assam-a Dima Hasao district thuneitute chuan nizan dar 8 aṭang khan Haflong leh Silchar inkara Jatinga-Harangajao kawng, NH 27 kawngpui chu lirthei lian chi tan kal phal a ni lo tiin hriattirna an chhuah.

India Meteorological Department chuan nimin aṭanga May 15 thleng ruah sur a tam dawn tia a sawi lawk avangin, helai kawngpui thawm ṭhat mek chu a chhiat zual lohna turin district thuneitute chuan he thuchhuah hi an siam a ni.

District Disaster Management Authority (DDMA) chuan zin veivakte him zawk nan leh kawngpuiin chhiat lam a pan zel loh nan he ruahmanna hi siam a ni tih an sawi. Barak Valley lama truck kal ṭhinte chu hriattirna dang chhuah leh a nih hma chu Meghalaya lama kawng chu zawh tura tih an ni. District Commissioner leh DDMA chairman ni bawk, Simanta Kumar Das chuan an district mipuite chu fimkhur tura chahin, ṭul lohah chuan zin chhuak lo turin a ngen.

District thuneitute chuan chhiatna nasa zawk a thlen hlauhthawn thilah sikul chu chhawmdawlna in atana ruahman niin, ni tin mamawh an tlakchham loh nan tihtur ṭul ti turin supply lama thuneitute chu hriattir an ni.

Harangajao leh Miyungkhro inkar kawngpui hi Silchar leh Haflong inkalpawhna kawng pawimawh tak niin, kar liam ta Nilaini zan khan ruah sur nasa avangin a min a, helai kawng zawhtu lirthei ṭhahnem takte chu an tangkhang a ni. Bungraw phur lirthei tam tak a dan bakah LMV chin pawh a helna kawng lama kaltir an ni bawk. Dima Hasao district chhungah vek hian Jatinga Lampur railway station bulah leitlahniamin rel (train) kal dan a tikhaihlak bawk.