Nagaland : Local bodies inthlanah hmeichhe tan 33% reservation siam dawn

Nagaland sorkar chuan June thlaa Urban Local Bodies (ULB) inthlan lo awm turah hmeichhe tan 33% seat hauh bik a nih tur thu Supreme Court hnenah a hriattir.

Supreme Court hian Nagaland sorkar hnenah hmeichhe tana 33% seat hauh bik tur hian a hmain a hriattir tawh a, hei hi sorkar chuan a zawm lo nia ngaiin, People’s Union for Civil Liberties (PUCL) chuan court thupek zah lohna thubuai SC-ah hian an theh lut a ni. SC chuan India danpui zulzuia ULB inthlan kalpui a nih loh chuan ṭha a tih angin Nagaland sorkar chungah thutlukna a siam ang, tiin a lo vaukhan tawh a ni.

Justice S.K. Kaul leh Justice Aravind Kumar-te ṭhut bench chuan Nagaland sorkar chu reservation dan zam zawm tura an hriattir bakah sorkar laipui pawh hemi kawnga state sokar kaihruai turin a ti bawk. Hemi chungchang hi July 16-a ngaihtuah leh turin a dah bawk.