Manipur : Zirlai raltlante tan 'School on Wheels' kalpui dawn

State chhung buainain kum khat a tlin hnu pawha remna leh muanna kawng la zawh thei lo Manipur chuan an state chhung buaina avanga raltlan zirlai, chhawmdawlna hmuna la awm mekte tan 'School on Wheels' an kalpui dawn. He hmalakna hi Vidya Bharati Shiksha Vikash Samiti, Manipur hnuaiah kalpui a ni ang.

Manipur governor Sushri Anusuiya Uikey chuan Bal Vidya Mandir Complex, Imphal-ah 'School on wheels' hi a tlangzarh a, chhawmdawlna ina zirlai raltlan awm mekte zirna kawnga hlamchhiah an nih loh nan ṭan an la dawn a ni.

'School on Wheels' hmalakna hnuaiah hian School bus chu chhawmdawlna in hrang hrangah tirh a ni dawn a, he bus-ah hian library, computer leh sports item a awm bakah zirtirtu pawh an kal tel ṭhin dawn a, heng hmang hian chhawmdawlna ina zirlaite chuan zirna an lo chhunzawm ve thei dawn a ni.

Manipur Governor chuan an hmachhawp chu lawmawm a tih thu sawiin, zirlai naupang buai vanga zirlai zir thei lote'n an chhawr ṭangkai ngei a beisei thu a sawi. Vidya Bharati Shiksha Vikash Samiti in hetiang hmalakna an nei hi chhuanawm a tih thu sawiin, chhawmdawlna ina zirlai naupangte chu zirna kawnga an hnufual bik loh a pawimawh hle tih a sawi bawk. Governor chuan Chief Minister leh Chief Secretary-te chu chhawmdawlna ina awm mekte chenna tur hmun nghet ngaihtuahsak turin a ngen nghal bawk.

Uikey chuan Vidya Bharati Shiksha Vikash Samiti-in zirna lama hma an sawn theih nana an thawhhlawkzia tarlangin, district parukah school 15 an enkawl bakah district pariatah Sanskar Kendras 36 an enkawl mek a ni, a ti. Heng an hmalakna avang hian primary zirlai naupangte chuan zirna mumal takin an dawn theih phah a, hemi bakah hian district hrang hranga raltlan zirlai 150 tan zirna bakah awmna tur leh ei leh in a thlawna an pek thu Uikey chuan a sawi.