Meghalaya HRC-in Ichamati inthahna chhui chiang turin hriattir

Meghalaya Human Rights Commission chuan March thlaa Ichamati hmuna Citizenship Amendment Act (CAA) duh lohna lantir a nih ṭuma mi pahnih thah an nih chungchang chhui chiang a, ni 15 chhunga report theh lut turin Meghalaya Director General of Police (DGP) a hriattir.

Ichamati hmuna mi pahnih thah an nih chungchangah hian online complaint theh luh a ni a, he complaint-ah hian nunna chân mi pahnihte chu ram leilung fa dik tak an nih loh thu leh, CAA duh lohna ralmuang taka neih a nih lai chu remchangah lain misualte hian an that tih tarlan a ni.

MHRC chuan complaint lut chu ngaihtuahin, Meghalaya police DGP chu tualthahna chhui chiang tur hian a hriattir ta a ni. Ichamati hmuna thah tak pahnih hi Insan Sing leh Sujit Dutta niin an thihna chungchanga rinhlelh thilah, Khasi Students Union (KSU) hruaitu ṭhenkhatin man an lo tawk tawh a, mahse, tualthattu tak erawh hriat a la ni lo thung.