Assam : Inthlanpui thawh thumna bial paliah nei dawn

Assam state chuan Lok Sabha inthlanpui neih mekah a thawh thumna leh an state tana a tawpna tur chu vawiin hian a hmachhawn dawn. Barpeta, Dhubri, Guwahati leh Kokrajhar bialah vote thlak a ni dawn a, heng biala campaign theih hun chu Pathianni khan tihtawp a ni tawh.

Assam-a inthlan neihna tur bial palite hi ram pum huapa party lian pahnih BJP leh Congress ṭhatna hmun an ni lo a, hemi a nih avang hian BJP chuan heng bial pali zinga bial pathumah chuan tualṭo party candidate seat an kian a ni. Barpeta leh Dhubri bialah NDA hnuaia an thawhpui Asom Gana Parishad (AGP) candidate chu an thlawp dawn a, Tribal tana bial hauh bik Kokrajhar-ah NDA-a an thawhpui tho, United People’s Party Liberal (UPPL) candidate an thlawp bawk ang. Congress erawhin bial paliah hian an chuh kim vek dawn thung.

Bial palia inthlan neihna turah hian candidate 47 an awm dawn a, vote nei mi nuai 80 chuang an awm bawk. Assam-ah hian April 19-ah inthlan thawh khatna neih niin bial pangaah vote thlak a ni a, April 26-ah inthlan thawh hnihna neih leh niin bial pangaah tho vote thlak a ni leh a ni. Vawiin vote thlak a zawh rual hian Assam huam chhunga bial awm zawng zawngah vote thlak zawh fel a ni dawn a, hmarchhak hmun dangah inthlanpui atana vote thlak hi zawh fel a nih tawh avangin Assam hian a hnu an khar dawn a ni.