FMR chu ramria venhimna ṭha zawk duh vangin tihtawp a ni : DGAR

Director General of Assam Rifles (DGAR), Lt. Gen. PC Nair chuan India leh Myanmar ramria zalen taka inkalpawh theihna (Free Movement Regime) chu ramria venhimna ṭha zawka kalpui duh a nih vangin sorkar laipui chuan a titawp tih a sawi.

Nair chuan pawl hrang hrangin he hmalakna hi an dodal a rin thu sawiin, ramria inkalpawhna tihdanglam a nih dan turah erawh chiang taka hriattirna an la dawn loh thu a sawi. Assam Rifles DG chuan ramria venhimna kalpui a nih dan tur chu an la hre bik lo a, inkalpawh dan tura kaihhruaina thar, mumal taka tihchhuah a nih hunah a kenkawh dan tur pawh a chiang dawn chauh niin a sawi.

DGAR Nair chuan India leh Myanmar ramriah drugs hmanga sumdawnna leh bungraw che vel a tam tih sawiin Covid lai pawhin hei hi a tlem chuang lo a ni, a ti. Nair chuan ruihhlo do kawngah Assam Rifles chuan theihtawp an chhuah reng a, tun hnai kum thum chhungin ruihhlo ṭhahnem tak an man tih a sawi bawk. Kum 2023 chhung khan Assam Rifles chuan dan phal loh thil ṭhahnem tak, Rs. vbc. 1,500 hu an man tih sawiin, paramilitary force pawhin tun April thlenga chhiarin dan phal loh thil, Rs. vbc. 900 hu an man tawh thu leh, heng zinga 90% chu ruihhlo a nih thu a sawi bawk.