Manipur-ah pawl hrang hrangten nawrh huaihawt

Manipur-a pawl hrang hrang te chuan lungawi lohna lantirin hmun hrang hrang-ah nawrh an huaihawt. Hei hian nunphung a tibuai hle a, mipui ten harsatna an tawk mek.

Km 222 zeta thui Imphal-Jiribam inkar National highway 37 chu darkar 24 dang dan chhunzawm leh a ni a, hei hi Tamenglong district-a Khongsang-Noney inkar kawng siam ṭhat phut avanga dan a ni.

Joint Committee on Inner Line Permit System (JCILPS) te chuan Inner Line Permit system Manipur-ah hman a nih leh theih nan darkar 42 awh nawrh an huaihawt tawh a, Inrinni khan an titawp. JCILPS hruaitu Khomdram Ratan chuan, "Pawl hrang hrang ten min thlawp ṭhat avangin kan lawm a, harsatna lian tham thleng a awm lo a ni" a ti.

Muslim te chuan an mi leh sa Sagolshem Prasanta thih dan hriat thiam har an tih thu sawiin, thu dik chhuichhuak turin sorkar an nawr ve mek bawk. Chief Minis-ter Okram Ibobi Singh chuan April 24-a Sagolshem Prasanta inawk hluma hmuh chungchang sawiin, postmortem a ni a ti a, he mi chungchanga thudik an hriat duh vanga sorkar an nawr chu a hriatthiampui thu a sawi. Singh chuan chhui chian mek a ni a, thudik a hriat thuai dawn a ni, a ti. April 17-a Nungrei thlil thlenga Muslim mi an man mi pathum te chu chhuah turin an phut. He thil thlengah hian mi 14 zetin hliam an tuar a, Inrinni khan Mayang Imphal coordinating club te chuan hliam tuar pahnih te hnenah Rs 200,000 an hlan nghe nghe. State sorkar chuan hliam tuarte hnenah hian zangnadawmna Rs 500,000 a pek tur thu a puang tawh bawk.

Manipur-ah hian pawl hrang hrang ten nawrh an huaihawt zing hle a, Joint Committee on Inner Line Permit System (JCILPS) te chuan ILP hman a nih leh theih nan kawng hrang hrangin hma an la mek a, Naga ten Scheduled Tribe Status pek phutin nawrh an huaihawt ve bawk.