Nabam Tuki-an ‘Save Democracy’ a thlawp

Arunachal Pradesh chief minister hlui leh Congress hruaitu hlun Nabam Tuki chuan sorkar laipuia Cong-ress hruaituten BJP sorkar chetdan demna leh Democracy vawnhim a nih zel theih nana hma an lakna ‘Save Democracy’ Campaign chu a thlawp thu a sawi.

Nabam Tuki chuan an state Arunachal Pradesh-a President’s Rule puan a nih chhanah governor chu mawhphurtu a ni a ti a, hei bakah hian Tawang buaina chhuak chungchangah Governor Jyoti Prasad Rajkhowa chu mawhphurtu a ni,a ti bawk. May 2-a Tawanga buaina chhuakah khan mi pahnihin nunna an chan bakah mi pangain hliam an tuar a ni. Heng thil thleng leh an state harsatna tawh chhan hrang hrangah hian Governor chu mawhphurtu zingah hian a tel niin Tuki chuan a sawi a, dan leh thupek kengkawh
ṭha tawk loah a puh a ni.

Arunachal Pradesh hian kawng tam takah harsatna a tawk mek a, sum leh pai indaih lohna avangin an buai hle a, hetih lai hian thli leh ruah nasa takin an state a nuai bawk vangin harsatna an tawh hi a thuah hnih hle. State sorkar chuan heng te hi sut kian tumin hma a la mek reng a, sum leh paia an harsatna chu siam ṭhat tumin hma an la mek a ni. State huam chhung hmun hrang hrangah buaina a chhhuak a, pawngsual leh thihna a thleng chamchi bawk. Heng thil thleng te hi sawi chhuakin Chief minister hlui Nabam Tuki chuan chuan BJP party beih nan a hmang a ni. Arunachal Pradesh-ah hian BJP sorkar piang thei hnaivai niawmin tunhnai-ah thuthang a awm a, heng denchhen hian Nabam Tuki hian thu a sawi chhuak a ni angem tih chu mipuite ngaih ven a ni mek.

Tun hnaia Congress party buat-saiha ‘Save Democracy’ rally, Delhi-a neih chungchang sawi chhuakin, Tuki chuan hetiang hi an state-ah buatsaih ve a nih tur thu a sawi. "BJP sorkar hian Democracy hi a palzut tih chu mipui te hian kan hria a, a do tura kan pen chhuah a ngai a ni" tiin, an state-a Congress party ten rally buatsaih an tum chungchang a sawi. Arunachal Pradesh leh Uttarakhand state-a thil thleng chu democracy rahbehna a ni a ti a, hetiang hi state dangah thleng tawh lo se Congress party chuan a duh a ni, a ti bawk.