Meghalaya sorkar in Covid-19 test man la tawh dawn
Meghalaya sorkar chuan October 16 aṭangin Covid-19 test man a la tawh dawn tih a sawi. Sorkar laipuiin testing kits leina tura sum pek a tihtawp tawh avangin test man hi lak a ni tawh dawn a ni.
Deputy chief minister Prestone Tynsong chuan he thu hi puangin, state dang aṭanga Meghalaya lut turte chuan rapid antigen test an tih ngei ngei a ngai a, October 16 aṭangin RAT man hi Rs 500 lak a ni dawn tih a sawi. RT-PCR, TrueNat leh Covid-19 kaihhnawih dang test manah Rs 3,200 lak a ni dawn bawk a, hospital pakuaah test hi tih theih a ni ang.
Indian Council of Medical Research (ICMR) leh sorkar laipui chuan July thla aṭang khan testing kits leina tura puihna state sorkar hnena an pek ṭhin chu an titawp tawh a, hei vang hian anni pawhin a thlawna test neihsak ṭhin chu an tihtawp chhoh a ngai ve dawn ta tih a sawi. Hemi rual hian district surveillance team-ten high-risk zinga a chhiarte test-na erawh chu sorkarin a la tum chhunzawm zel dawn a, anni bakah BPL chhungkuate pawhin test man an chawi a ngai dawn lo tih a sawi bawk.
Tynsong chuan October 16 aṭang chuan Covid Care Centre (CCC) hrang hranga hri kai enkawlte pawhin an ei leh in man an pek a ngai tawh dawn tih a sawi bawk. CCC hrang hranga ei man hi bithliah turin deputy commissioner-te hriattir an ni. In lam aṭanga ei tur inpe duh tan pek phal a nih thu a sawi.
Hri dona atan Rs vbc 399 hmang tawh
Deputy CM chuan March thla aṭanga September thla tawp thlengin state sorkarin Covid-19 dona atana a sum sen chu cheng vaibelchhe 399 a ni tawh tih a sawi. Hemi chhunga hri leng dona atan sorkar laipui aṭanga ṭanpuina an dawn chu cheng vaibelchhe 48 a ni tih a sawi bawk.
State sorkarin a sum sen zingah cheng vaibelchhe 189.9 chu National Health Mission (NHM) aṭangin a ni a, Corona Care Centre siamna te, ambulance leh PPE leina atan te leh laboratory siamna atan hman a ni. Director of Health Services (DHS) aṭangin sorkar chuan BiPAP machine, oxygen cylinder, Digital IR Thermometer, ply mask, glove leh thermal scanner leina atan Rs vbc 82.4 a hmang bawk.
State danga tangkhangte hruai hawna atan leh, hmanrua mamawhte leina atan Chief Minister’s Special Grant (CMSG) aṭangin Rs vbc 14.7 hman a ni a, Chief Minister’s Relief Fund (CMRF) aṭangin ambulance leh biomedical waste management vehicle leina leh thil dangah Rs vbc 7.4 hman a ni tawh bawk a ni.
Tynsong chuan nitina inhlawhfa ṭhin, hripui leng vanga hna thawk thei loa hun rei tak awmte chhawmdawlna turin Chief Minister’s Relief Against Wage Loss Scheme aṭangin Rs vbc 51 sem a ni tawh bawk a ni, a ti.
District Mineral Fund (DMF) aṭangin screening point leh quarantine centre hrang hrangah Rs vbc 8.9 hman a ni a; laboratory siam belhna te, testing kits, PPE, thermal scanner leina leh containment zone siamna atante State Disaster Response Fund (SDRF) aṭangin Rs vbc 23.7 sen a ni.
MLA tinte hnenah an constituency huam chhung ṭheuh puihna atan advance-in Rs nuai 25 ṭheuh pek lawk an ni a, hemi atana sum sen hi Rs vbc 15 a tling bawk niin Deputy CM chuan a sawi.