Manipur sorkarin chhiat tawkte ṭanpui nan Rs vbc 6.9 ruahman

Manipur state chhung hmun hrang hrangah thlipui tleh, ruah sur leh rial tlain chhiatna tam tak a thlen a, state sorkar chuan chhiat tawkte chhawmdawl leh zângnadawm nana pek tur Rs. vbc. 6.90 a ruahman tih a puang.

Sorkar official-te chuan khuarel chhiatna an tawh avanga chenna in nei lote tan state chhunga district hrang hrangah chhawmdawlna in 42 an siam a, hetah hian mi za tel an khawsa mek a ni.

Manipur-ah hian kar liam ta Pathiannia khuarel chhiatna thleng khan chenna in 15,000 chuang a tichhia nia tarlan a ni a, mahse, endikna mumal taka kalpui a nih hnuah thlipui, ruah sur leh rial tla avanga chhiatna thleng hi an chhut aia a nasat zawk rin a ni.

Chief minister N Biren Singh chuan chhawmdawlna sum an ruahman zat hi Thawhṭanni tlai khan thuthar thehdarhtute hmaah a puang a, sum hi Manipur State Disaster Relief Fund (SDRF) aṭanga pek chhuah tur a nih thu a sawi bawk. Ṭanpuina sum hi a thlawna ei tur sem nan leh chhiatna thlenna hmuna mamawh hrang hrang; tarpaulin, GI sheets leh chhawmdawlna ina awm mekte ei tur lei nan hman a nih tur thu Chief Minister chuan a sawi. Hemi bakah hian ṭek tlain a den hlum chhungte chu zângnadawmna an pek tur thu a sawi bawk.

Rial tlain in chung a den chhiat hnem avangin rangva mamawh an tam hle a, hei hi sumdawngte chuan remchangah lain an rangva zawrh mekte chu to takin an chhiar zui a, mahse, mipui harsatna hrethiamin sorkar chuan rangva man chu a lo khuahkhirh tawh a ni. Sorkar chuan district commissioner-te chu an bial chhungah ṭheuh rangva man enfiah tur hian thupek a tichhuak a ni.

Manipur-a khuarel chhiatna thleng hi state chhunga district 16 awm zinga district 15 chuan an tuar a ni. Heng zingah hian district pahnih Imphal West district (chenna in chhe zat 6,053) leh Imphal East district (chenna in chhe zat 5,600)-te chu a tuar na zualte an ni. Sorkarin chhawmdawlna tura sum a ruahman aṭang hian valley district pangate hnenah Rs. nuai 50 ṭheuh leh, hill district 11-te hnenah Rs. nuai 40 ṭheuh pek an ni ang.

Khuarel chhiatna thlengin ran vulh, huan thlai leh leilet, motor a tihchhiat dante pawh enfiah mek a ni tih CM chuan a sawi a, chhiatna tawkte hi sorkarin a theih angin a pui zel dawn a ni, a ti.