Assam: Dhubri biala polling station pakhatah buaina chhuak

Lok Sabha inthlanpui thawh thumna chu nimin khan Assam-ah neih niin Lok Sabha constituency pali-Kokrajhar, Dhubri, Barpeta leh Guwahati-ahte vote thlak a ni. Hriat theih chinah tlai dar thum thleng khan vote 63.08% a tla tawh a ni.

Kokrajhar hi tribal tana bial hauh bik niin a bak bial dang erawh tu tan pawn chuh theih a ni. Assam-a vote thlak zawh rual hian hmarchhak pumah Lok Sabha inthlanpui atana vote thlak chu a zawh fel a ni ta.

Dhubri bial chhunga Mankachar polling station-a vote thlak tumte chu an intlarna lamah innek buaiin polling station pawnah tharum thawhna a thleng nia tarlan a ni. Buainain zual lam a pan loh nan a hmunah venghimtute tirh luh nghal an ni. Mankachar tih loah chuan buaina lian tham chhuak hriat a ni lo a, inthlan hi ralmuang taka zawh fel a ni. Bongaigaon-ah thil thleng duhawm lo dang awmin Mohanpur Nayapara Primary School no. 171 polling booth-a polling agent chu a duty laiin nikhaw hre loin a tlu a, inthlan neih lai chu darkar chanve dawn an chawlh lailawk phah a ni.

Assam-a bial paliah hian candiate 47 an awm a, heng zinga candidate paruk chu hmeichhia an ni. Bharatiya Janata Party (BJP) leh Congress chuan Guwahati bialah hmeichhia ve ve candidate-ah an dah bawk.