Assam sorkarin sikul 96 a titawp dawn

Assam sorkar chuan an state chhunga sikul 96 chu zirlai naupang an neih tlem avangin a titawp dawn. Hemi hma hian zirna in 8,000 chuang chu sikul naupang neih tlem avang hian a lo titawp tawh bawk.

Assam Secondary Education Director thuchhuah chuan Assam Secondary Education (Provincialisation of Schools) Amendment Act, 2017 hnuaiah heng sikul tihtawp turte hi sikul dang zirlai naupang an awm ṭhatna nen chhunfin tur a ni tih a tarlang. Sikul 96 tihtawp turte hi provincialized high school 79 leh senior secondary school 17 an ni. Sorkar chuan sikul tihtawp tura zirtirtute leh hnathawktu dangte chu a bulhnai sikulah sawn an nih tur thu a puang nghal bawk.

Sorkar thutlukna hian sawisel a hlawh hle a, sikul tam tak, a bikin thingtlang sikul tihtawp tura zirlaite chuan an tuar dawn tih sawiin lehkha an zir chhunzawm theih nan hmun hla zawk pan a ngaih phah dawn tih an sawi. Hemi bakah hian heng zirna in tihtawp tur thawmṭhat nana sorkarin sum leh tha a lo sen tawh pawh a thlawna a luan ral dawn tak avangin sawisel a hlawh hle bawk.