Manipur sorkar tuition fee 30% la turin hriattir

Manipur education department chuan state chhunga private leh aided school hnenah hripui leng vanga zirna in khar a nih hnu, April thla aṭanga chhiarin zirlaite tuition fee chu 30% la turin a hriattir. Hemi rual hian hemi hun chhunga zirtirtute leh staff-te hlawh chu 50% pe turin a ti bawk. 

Commissioner of education(s) T Ranjit Singh chuan school-ten monthly fee an lak chu 50% aiin a tam tur a ni lo a, zirtirtute leh staff-te hlawh pek chu 50% aiin a hniam tur a ni lo, a ti. 

Sorkar thuchhuak hi zirlai pawl, All Manipur Student's Union chuan an thlawp lo thung a, he thupek hi sut a nih loh chuan state pum huapa nawrh huaihawtah an vau. Zirlai pawl leh civil society organization aiawhte chuan education minister hi ṭum eng emaw zat meeting neihpui tawhin, hri leng vanga zirna in khar a nih chhunga zirlaite hnena tuition fee la lo turin an lo ngen tawh a ni. 

Hei vang hian education department chuan school-te chu fee la lo tur leh, zirtirtute hlawh 50% pe turin a ti a, mahse hemi hnu hian thupek thar hi tichhuak lehin, private leh aided school-te chu tuition fee 30% chin lak a phalsak leh ta a ni.