Naga peace accord tur duang fel tawh Flag leh constitution hran phutna hnawl a ni
Sorkar laipui chuan Naga peace talk neih mekah inremna ziahna tur a duang fel tawh a, National Socialist Council of Nagaland (Isak-Muivah) in flag leh constitution hran an phutna erawh a hnawlsak.
Sorkar chuan inremna ziahna tur hi duan fel ni tawhin, state chhunga helpawl leh civil society organisation hrang hrang ziahpui a tum. Hetih lai hian Th. Muivah kaihhruai NSCN(I-M) chuan inremna ziahna tura duan hi an pawm thu an la sawi lo a, mahse pawl hrang hrangte chuan hun rei tak Nagaland buaina chinfel a nih theihna turin 'final draft agreement' hi an pawm niin sorkar lam chuan a tarlang.
Naga peace talk neihah sorkar laipuiin remna palai hna thawk tura a ruat, Nagaland Governor RN Ravi chu draft-agreement tifel tur hian New Delhi-ah a awm mek bawk.
Ni 10 chuang liamta khan Th Muivah hoin NSCN-IM aiawhte leh Intelligence Bureau (IB) officer-te inbiakna chu zawhfel a ni a, Nagaland tana flag leh constitution hran an phutna pawh hnawlsak nia sawi a ni. Hetih lai hian Naga hel hruaitute hian inbiakna hi zawhfel la ni lo anga lantir tumin, IB officer-te nen hian meeting an nei lo tia an sawi thu security lam chuan a tarlang bawk. NSCN-IM lam hian inremna siam tum hi thil harsa tak tak phutin tihkhawtlai an la tum a, mahse sorkar laipui chuan Naga political issue hrang hrangah inremna tur duan a nih tawh avangin tihkhawtlai a tum tawh lo niin a sawi bawk.
Naga peace accord ziah turah hian Naga helpawl pasarih awmna, NNPG bakah Naga Tribal Hoho pawl 14 leh Nagaland Gaon Burah (GB) Federation pawhin hming an ziak tel dawn a ni.