Meghalaya : Harijan colony-a chengte sawn chhuah dan tichiang dawn

Meghalaya sorkar chuan Harijan colony-a chengte sawn chhuah an nih dan tur chu June 7-a committee hunah a tichiang tawh dawn. Committee-ah hian Meghalaya sorkar leh Harijan Panchayat Committee (HPC) chuan inbiakna an nei dawn a ni.

Harijan colony-a chengte, Shillong khawpui chhung hmun danga sawn chhuah an nih dan tur chungchang hi May 7, Thawhlehni khan deputy chief minister Prestone Tynsong, Advocate General, sorkar official leh Harijan Colony-a chengte aiawh chuan sawihona an nei a, mahse, thutlukna an siam thei lo. Harijan colony-a cheng aiawhte chuan sawn chhuah an nih dan tur leh duh dan tihchian nan thla khat hun an mamawh tih an sawi. Deputy CM Tynsong pawhin an ngen angin thla khat hun pek leh an ni a, June 7-a meeting an neih leh hunah chuan thutlukna siam fel a ni tawh dawn tih a sawi a, sorkar chuan a ṭha ber tur angin hma a la dawn a ni, a ti.

Harijan colony, Shillong hi Punjabi Lane emaw Them Iew Mawlong tia hriat a ni bawk a, hetah hian Sikh-te chu a cheng tam ber an ni. Meghalaya ram leilung fate nen an inkarah inrem lohna awm avangin helaia Sikh chengte chu hmun danga sawn chhuah tum a ni. Tunah hian Harijan colony-ah hian chhungkaw 342 an khawsa mek a ni.