Tripura : ONGC leiverh vangin Mandabakilla khua lungawi lo

Oil and Natural Gas Corporation (ONGC) chuan Tripura-a Mandabakilla khua leh a chhehvela lei an verh ṭhin avangin helai bul hnai khuate chuan ONGC leiverh hian thil tam tak a tichhia tiin an lungawi lo hle.

Mandabakilla khuaa chengte chuan ONGC leiverh avang hian an leiletah tui a tlin theih loh phah tih sawiin hemi bakah hian in leh lo chhia pawh a awm niin an sawi. An chenna inte chu a khi nasa hle tih an sawi a, a chhunga chengte tan a him lo thei a ni, an ti. Heng avang hian leiverh hna tihtawp a nih theih nan Mandabakilla mipuite chuan lungawi lohna lantirin hnathawktute chu an dang a ni.

Mandabakilla khaw mite chet dan avang hian ONGC lam chuan Bishalgarh police station-ah mi pali lakah thubuai an theh lut a, an hnathawh an tibuai niin an tarlang. Mandabakilla khaw mipuite leh ONGC hnuaia thawkte inkar hi a ṭha lo hle a, Thawhlehni zing khan Tripura State Rifles (TSR) chuan an buaina chu a hmunah kalin an enfiah a, buaina nasa zawk a chhuah loh nan ONGC hnathawhna hmunah venhimna an kalpui dawn niin an tarlang.