Nagaland : Wokha district-a sikul 33 tobacco-free-ah puang

Nagaland-a Wokha district chhunga sikul 33 chu chief medical officer Dr Zuben Kikon chuan vaihlo hman lohna hmun a ni tih a puang.

National Tobacco Control Programme (NTCP)-in Wokha deputy commissioner conference hall a district-level coordination committee leh district-level enforcement squad meeting neihnaah a puang a ni.

NTCP district nodal officer, Dr Chenithung Yanthan chuan Wokha district chhungah sikul 191 a awm thu sawiin, heng zinga sikul 103 chu vaihlo hman lohna hmuna puan a nih tawh thu a sawi. A la bang sikul 88 pawh vaihlo hman lohna hmuna puan anih ve thuai theih nan hmalak mek a ni tih a sawi lang bawk.

Sikul mai bakah hian district chhunga health centre 50 chu vaihlo hman lohna hmun an nih tawh thu Yathan chuan a sawi bawk. An district chhunga khaw panga chu vaihlo hman lohna hmuna puan a nih thu tarlangin, zuk leh hmuam tiṭhinte tan counselling an kalpui reng thu te, zuk leh hmuam an thlah theih nan damdawi nen an ṭanpui ṭhin thu an tarlang.