Tripura : Tuialhthei harsat avangin CM-in Railway Minister lehkha thawn

Tripura chief minister Manik Saha chuan union railway minister, Aishwini Vaishnaw hnenah lehkha thawnin, an state chhunga tuialhtheia harsatna an tawh mek chu a chinfel dan ngaihtuahsak turin a ngen.

Assam-a Jatinga Lampur leh New Harangajao inkara rel a tlan theih loh avangin hmarchhak state tam tak chuan tuialhthei an duh khawp an hmu lo a, heng state zingah hian Tripura pawh a tel. Petrol leh diesel an duh khawp an hmu thei lo a, hei vang hian harsatna an tawk mek a, kar liam ta aṭang khan a hralh chhuah kawngah pawh sorkar chuan bithliah a siam tawh a ni.

Chief Minister chuan inthlan kaihhnawih avangin Union Minister hi biakpawh mai a harsa tih a sawi a, mahse, an harsatna tawh mek chungchang hi ziakin a thlen a, an officer-te pawhin an ngaihven reng tih sawiin, an harsatna tawh mek chu an chinfel thuai theih a beisei thu a sawi.

Tripura Chief Minister ngenna hi railway ministry chuan an ngai pawimawh tih Chief Minister Office (CMO) chuan an tarlang a, ni hnih emaw ni thum hnuah a ṭul anga hma an lak tur thu railway thuneitute chuan an hrilh thu an tarlang. Chief Minister hian tuialhtheia an harsatna tawh mek chu a vei hle a, a chinfel dan a ngaihtuah reng tih CMO chuan an tarlang bawk.