Manipur : Dan bawhchhia mi 96 man an ni tawh

Manipur police-te chuan an state chhunga dan leh hrai kenkawh a nih theihna atana hmalakna kawng khat atan Manipur chhunga district hrang hrangah awmze mumal tak neiin checkpoint 130 an siam a, heng checkpoint-ah hian mimal zin veivak bakah bungraw phur lirtheite endik ṭhin an ni.

Checkpoint-a dan bawhchhia an mante hi mi 96 an tling tawh tih police chuan an tarlang. Hei hi Manipur chhunga dan rorelna mumal zawk a awm leh theih nana hmalakna pawimawh tak a ni. Checkpoint mai bakah hian security force-te chuan Manipur tlangrama district leh Imphal phairuama district hrang hrang, a bikin buaina chhuah hlauhawmna laiah ralthuam dap hna leh helpawl nawr chhuak turin hma an la reng bawk tih tarlangin, heng hmalaknate hi Manipur mipuite ralmuan zawk nan leh him zawka an awm theih nana tih a nih thu an sawi.

Venhimna bakah hian thuneitute chuan ni tin mamawh bungraw phurte'n harsatna an tawh loh nan ṭan an la bawk. Kawngpui pawimawh tak tak, National Highway 37 leh 2-a chakkhai phur lirtheite chu an escort ṭhin a ni. Heng an hmalakna avang hian Manipur chhunga ni tin mamawh phurtu lirtheite chu him takin an tum hmun an thleng thei ṭhin a, mipui nawlpuiin harsatna an tawh loh phah bawk.

Manipur sorkar hian venhimna an tihkhauh bakah bungraw phur lirtheite himna a ngai pawimawh hle a, heng an hmalakna karah hian state chhunga dan loa lut tam tak dap chhuah hna an thawk mek bawk. Manipur chief minister N Biren Singh chuan May 7 thlenga chhiarin Manipur chhunga dan loa cheng mi 5457 an hmuhchhuah tawh thu Nilaini khan a tarlang. Chief Minister chuan heng mite hi an ram lama thawn let hna kalpui mek a nih thu sawiin,an dinhmun chu buaithlak hle mah se, ṭha takin an hmachhawn niin a sawi.