Meghalaya : Ni 10 chhungin ruihhlo Rs. vbc 15 hu man

Meghalaya Police chuan ruihhlo do beihpui thlak an nei chhunzawm zela, ni 10 chhungin East Jaintia Hills district chhungah ruihhlo Rs. vbc. 15 hu an man tih an tarlang.

East Jaintia Hills police-te chuan thu an dawn bawhzuiin heroin leh marijuanna, Rs. vbc. 3.6 hu chu a neitu ni ngeia hriat mi pathum nen an man a, ruihhlo hi an chuanna bus-ah mansak an ni. Hei hi tunhnai ni 10 chhunga ruihhlo an man ṭum ngana chiah a ni. Hemi hma hian, May 2-ah heroin Rs. vbc. 1.1 hu leh a kawltu mi pathum an man a, May 1-ah heroin Rs. nuai 10 hu man lehin, hemi ni vek hian ruihhlo Rs. vbc. 2.1 hu leh a kawltu mi pathum man an ni bawk. April 27 khan East Jaintia Hills Police-te chuan Rattachera-ah heroin Rs. vbc. 7.2 hu an man bawk a ni.

Meghalaya Director General of Police (DGP), LR Bishnoi chuan East Jaintia Hills police-te hnathawh chu fakin, hun rei lote chhunga ruihhlo ṭhahnem tak an man thei chu lawmawm a tih thu a sawi. Meghalaya chief minister Conrad Sangma pawhin ruihhlo hmanga sumdawnna tihtawp a nih theihna tura state police-te hmalakna chu fakin, May 8-a Rs. vbc. 3.5 hu heroin leh marijuana an man bakah a kawltute an man tel chu lawmawm a tih thu a sawi bawk.