Nagaland leh Japan inṭhianṭhatnain bung thar a kai : Japan Ambassador

Nagaland-a ni hnih chama zin, Japan ambassador, Hiroshi Suzuki chuan Nagaland leh Japan inṭhianṭhatna chuan bung thar a kai tih a sawi a, Nagaland ṭhalai tam tak chuan kut themthiamna zir tur leh hna zawngin Japan an pan a ni, a ti.

Hiroshi Suzuki chuan Japan lama awm Nagaland ṭhalaite chu fakin, an hmingṭhat thu leh Japan company liante pawhin Naga ṭhalai tam zawk chhawr an duh niin a sawi. Suzuki chuan nikum December thlaa Japan company, ARMS leh Nagaland University-in Japan ṭawng zirna course Kohima-a hawng tura MoU an ziah thu sawi langin, hei hian rah ṭha a chhuah ngei a beisei tih a sawi a, Naga ṭhalai tam zawkin Japanese an zir a, an thiam phah ngei a beisei tih a sawi bawk.

Eco-Park sak tur chungchang pawh Suzuki chuan sawi langin, hemi hmang hian Japan leh Nagaland inkarah thawh dunna ṭha zawk a awm thei dawn a ni tiin, hemi bakah hian India leh Japan ṭhalai tam zawk intlawhpawh chuan ram pahnih inkarah inṭhianṭhatna nghet zawk a thlen ngei a beisei niin a sawi bawk.

Japan Ambassador hian ni hnih chamin Nagaland hi a tlawh a, a cham chhung hian state chhunga hun pawimawh tak tak a hmanpui bakah hmun pawimawh tak tak a tlawh a, Nagaland chief minister Neiphui Rio chuan a telpui zel bawk. Hiroshi Suzuki hian nimin khan Nagaland hi a chhuahsan a ni.