Manipur : CoTU leh TYA -in hmun ralmuang lo laiah AFSPA hman leh an duh

Manipur-a Committee on Tribal Unity (CoTU) leh Thadou Youth Association (TYA) chuan an state chhunga hmun ṭhenkhatah Central Security Force-te'n beih an tawh bakah ruk bo an ni ṭhin tih tarlangin, central force-te him zawk nan sorkar laipui hnenah state chhunga hmun pawimawh laiah Armed Forces Special Powers Act (AFSPA) hman leh an duh tih an sawi.

CoTU leh TYA chuan central sipai-te dinhmun chu a him lo takzet tih tarlangin, May 8-a National Highway 2 hmuna CRPF Jawan ruk bo a ni chu central force-te him lohzia tichiangtu pakhat a ni, an ti. Pawl pahnihte hian Imphal phairuama chetla ṭhin helpawl laka Central Security Force-te'n humhimna an tlachham lutuk chu hriatthiam harsa an tih thu an sawi bawk. CoTU chuan central force-te'n ralthuam ruk chhuah dap hna an thawh theih nan an kuta thuneihna sang zawk pek a ngai tih sawiin, heng hmalakna hi inlak hran duhte do let nan a pawimawh tih an tarlang tel bawk.

TYA chuan Naranseina-ah CRPF-in beih an tawh thu tarlangin, hemi bakah hian Shantipur-a inruk bona thleng chuan Manipur chhunga central force-te an him lohzia a tichiang niin an tarlang a, sorkar laipui chu dan leh hrai state chhunga kenkawh a nih leh thuai theih nan inrawlh se an duh tih an sawi. "Mipui venghim turte pawh an him loh chuan mi nawlpui tan chuan remna leh muanna beisei a har a ni," an ti.