Tripura : Minister-in tuialhtheia harsatna sukiang turin ṭan an la tih sawi

Tripura food and civil supply minister leh transport minister ni bawk, Sushanta Chowdhury chuan state chhunga tuialhtheia harsatna an tawh mek sukiang turin ṭan an la reng tih a sawi a, hemi atan hian Indian Oil hotute leh ministry of railways hotute nen an inbepawp reng tih a sawi bawk.

Assam, Jatinga Lampur leh New Harangajao inkara rel a tlan theih loh avangin hmarchhak state tam takah a hma anga chakin ni tin mamawh phurh luh theih a ni lo a, Tripura pawh hian tuialhtheiah harsatna an tawk mek a ni. Supply minister Chowdhury chuan Jatinga bulhnaia rel kawng chhiat avanga harsatna an tawh thu mipuite chu hrilh hriain, Tripura chhunga bungraw phur luttu relte chu an khawtlai phah niin a sawi.

Chowdhury chuan tuialhthei a phurh luh theih loh avangin petrol pump chuan harsatna an tawk a, chumi chuan mipuiteah hlauhthawnna a siam niin a sawi. Sorkar chuan an harsatna sukiang turin theihtawp a chhuah reng tih leh, supply department lama a thawhpuite leh Indian Oil hotute chu an harsatna chinfel dan zawnga an inbiak reng thu a sawi a, petrol leh diesel lama an harsatna tawh chu sutkian thuai a ni dawn niin a sawi bawk.

Tripura chief minister Manik Saha chuan railway ministry lamah an state-in harsatna an tawh chu a thlen tawh tih Chowdhury chuan a sawi a, CM chuan mipuite harsatna sukiang turin theihtawp a chhuah a ni, a ti. Tripura-in ni tin mamawh an lak luhna kawng a pin avang hian bungraw thleng tur dan a ni a, heng hi remchangah hmangin sumdawng ṭhenkhat thei, thlai, tel leh thil dang zuarte chuan a man an tisang niin supply minister chuan a sawi a, hetiang zawnga remchang la lo turin thlai thar zuartute chu a ngen a, a ngenna ngai pawimawh loa thil man tisang lui an awm a nih chuan an chungah dan anga hmalak a ni dawn tih a sawi.