Assam : NGT-in ramngaw humhalh chhunga chet lakna a chhui chiang

National Green Tribunal (NGT) chuan Assam-a Sonai Rupai Wildlife Sanctuary leh Charduar Reserve Forest chhunga polling station siam, sikul sak leh thil danga chet lakna awm chu a chhui chiang dawn. NGT chuan heng hmalaknaa phalna petu officer-te NGT hnena hrilh hre turin Assam chief secretary chu a hriattir bawk.

State sorkarin April thlaa affidavit a theh luhah heng ramngaw humhalhah hian sikul sak hna, thingpui huan siam, kawng sial leh tuichhunchhuah laih hna kalpui a ni tih hmuhchhuah a ni. Heng avang hian social activist Dilip Nath chuan complaint a theh lut a ni.

National Green Tribunal (NGT) chuan heng hmalakna zinga ṭhenkhat chu kum 2017-a mi daih a ni tawh chungin Principal Chief Conservator of Forest (PCCF)-in hnathawh titawp tura chet a la lo chu mak an tih thu an tarlang. NGT chuan ramngaw humhalha sikul sak hna thawh a nih avangin school management committee leh contractor lakah FIR theh luh a nih thu sawiin, ramngaw humhalh zawnga hmalakna rei tak a awm lo chu an hriatthiam loh thu an tarlang.

Ministry of Environment, Forests and Climate Change chu kar li ral hma ngeiin counter-affidavit theh lut turin a hriattir a, officer ṭhenkhat ramngaw humhalh chungchanga thawk ṭha tawk lote chunga hma an lak dan tarlang turin a ti bawk. M.K. Yadava, PCCF hlui leh Special Chief Secretary (Forest) ni mek chu Geleky Reserve Forest-a hmunhma sak hna a pawm avang leh, Assam-Mizoram ramria ramngaw humhalh lai police tana a pek avangin chhui chian a ni dawn bawk.