France ambassador-in Meghalaya a tlawh

India rama France palai, Thierry Mathou chuan a vawi khat nan Meghalaya-a tlawh a, India leh France chu inṭhianṭha tak an ni tih a sawi a, Meghalaya leh France inlaichinna pawh tihnghet zel a duh thu a sawi.

Mathou chuan, "Shillong hi ka vawi khat tlawhna a ni a, France leh India hi inṭhianṭha tak niin, Meghalaya ka tlawh chhan pawimawh tak chu France leh Meghalaya inkar engtin nge kan tihnghet zual theih ang tih hriat tuma rawn kal ka ni" a ti. Mathou hian Zirtawpni khan Mawphlang, East Khasi Hills-a hmun pawimawh hrang hrang a tlawh a, hnam chindan phung inhriat sak nana intlawhtawn a pawimawh thu a sawi bakah helaia chengten ramngaw an humhalh dan chu zirchian a duh thu a sawi bawk.

France palai, Mathou hian Meghalaya leh France thawhdun theihna kawng hrang hrang zingah infiamna lam chu inlaichinna ṭha siam nana a pawimawh hlea a hriat thu leh, Meghalaya chuan infiamna lamah theihna sang taka a nei nia a hriat thu a sawi. France palai hian vawiin aṭanga neih ṭan tur, India leh France sipai-ten intuaihriamna hun Shillong-a an neih tur chu hawng tura beisei a ni a, he hun a hmanpui zawh hian Meghalaya chhuahsan tura ruahman a ni.