Kaziranga National Park-ah a ruka sa peltu mi pakhat kaphlum

Assam-a Kaziranga National Park and Tiger Reserve (KNPTR)-ah dan phal loha ramsa peltute leh forest guard-te chu Inrinni khan an inkap a, a ruka sa peltute zinga mi pakhat chu kahhlum a ni.

Sonali Ghosh, KNPTR field director chuan park chhungah ramsa pel tuma lut ru an awm ṭhin avangin thuneitute chuan venhimna uluk lehzual in an kalpui tih a sawi. Eastern Assam Wildlife Division leh Biswanath Wildlife Division aṭanga forest frontline team-te chuan Zirtawpni aṭangin park chhung luhka an ven thu sawiin an patrol reng tih a sawi. Inrinni khan Erasuti anti-poaching camp bula duty-te chuan tu tih hriat loh park-a luh ruk tumte chu an lo dang a, hemi hnu hian an inkap zui a ni, tiin Sonali chuan a sawi.

Forest guard-te chuan zing lam dar 5 velah sa peltu mi pakhat ruang an chhar tih Sonali chuan a sawi a, hemi bakah hian .303 rifle leh a mu engemaw zat an chhar tel tih a sawi bawk. Ruang an chhar chu tunge a ni tih hriat a ni lo a, a bul hnai khua aṭangin mibo an awm lo bawk tih a sawi. KNPTR field director chuan Assam Police puihna in midang tlanchhe hmante pawh an la zawng zel dawn tih a tarlang tel bawk.