Tripura : Tuialhtheia harsatnain ziaawm lam a pan

Tripura chhunga bungraw phurh luhna rel kawng a chhiat avanga state chhunga ni 15 harsatna an tawh chu bungraw phur rel an tlang leh tawh avangin a ziaawm ṭan.

Tuialhthei phurtu rel chu Dharmanagar railway station, North Tripura district-ah nimin khan a thil phurh a thlen leh tak avangin state chhunga tuialhtheia harsatna an tawh pawhin ziaawm lam a pan a ni. Rel kawng chhia hi Jatinga Lumpur leh New Harangajao inkara mi niin Tripura mai bakah hmarchhak state dangte bungraw lakluh pawh a tikhaihlak hle.

Indian Oil Corporation Limited (IOCL) state coordinator, Pramit Dhar chuan North Tripura lamah tuialhthei sem chhuah mai theih turin a ṭul angte tih mek a nih thu a sawi. Dhar chuan railways lama thuneituten Tripura chhunga bungraw phur lut turte kaltlangtir an phalsak thu sawiin, rel kawng chhia pawh siam zawh a nih tawh thu a sawi bawk. Tripura chhunga tuialhthei phurh luh hi wagon 49 niin heng zinga 30 chu petrol niin a bak 19 chu diesel a ni.

Dhar chuan tuialhthei phur rel dang pawh Silchar, Assam-a a awm mek thu tarlangin Tripura lam a pan leh thuai dawn niin a sawi bawk. Tripura chief minister Manik Saha chuan state chhung harsatna hriaa chak taka hma a lak avangin union railway minister Ashwini Vaishnaw hnenah lawmthu a hrilh a, hemi bakah hian Northeast Frontier Railway thuneitute leh hnathawktute pawh rel kawng a tlang leh theih nan rim taka hna an thawh avangin lawmawm a tih thu a tarlang tel bawk.