ASGCTD&HU ten ‘Goonda Tax’ dodal

All Assam Goods Carrier Truck Drivers & Handymen Union te chuan Assam-ah May 11-12 chhungin nawr an huaihawt dawn tih an sawi. Nawrh huaihawt chhanah hian Police leh Transport official ten Meghalaya-a “goonda tax” an lak duh lohna leh sut leh tura an nawrna a nih thu an sawi.

All Assam Goods Carrier Truck Drivers & Handymen Union te hian May 11 leh 12 khian Jorabat-ah lungawilohna hi an lantir dawn a, Prime Minister leh Home Minister hnenah memorandum thehluh an tum bawk.

ASGCTD&HU chuan Meghalaya kaltlanga bungrua an phurh chuan Police leh Transport official hnenah hian pawisa an pek a ngai dawn tih an sawi. ASGCTD&HU general secretary Mahendra Talukdar chuan “goonda tax” vang hian harsatna an tawk mek tih sawiin, Police te chuan Truck pakhat zelah cheng 200-500 an la ṭhin a, Transport department official lam hian a tlem berah cheng 500 an la ṭhin a ni a ti. Pawisa hi hmun hran hran Byrnihat, Umlong leh Ladrymbai bakah Khliehriat-ah te khawn ṭhin a ni a, hei hian harsatna tam tak a siam tih sawiin, tih tawp vat an duh thu a sawi.

Meghalaya hi nitin Truck 1,500 velin a paltlang ṭhin a, Mizoram lehTripura-ah te bungrua an dan ṭhin a ni. All Assam Goods Carrier Truck Drivers & Handymen Union te chuan dan loa Meghalaya police leh Transport Deparment ten sum an lak luh hi ni khatah cheng nuai 20 chuangte a tling ṭhin a ni an ti. Dan loa sum lak chu an duh lo tih sawiin, tih tawp thuai an duh thu an sawi.