Tripura-ah rel tlan Ṭan

Passenger phur rel chuan Tripura a thleng ta a, Zirtawpni zing aṭang khan Silchar aṭanga chhuak passenger phur rel chuan Tripura khawpui Agartala chu a thleng.

Northeast Frontier Railway (NFR) spokesman Nripendra Bhattacharjee chuan Zirtawpni aṭang khan rel hi tlan ṭan tir a ni a ti a, May 20 thleng tlan tir phawt a ni ang.

Tripura hian passenger 333 a phur thei a, NFR’s chief public relations officer Pranav Jyoti Sharma chuan ruahsur nasa leh lei min nasa tak avangin harsatna an tawk tih sawiin, Guwahati - Silchar rel service pawh April 27 aṭang khan tihtawp lailawk a ni a ti.

Northeast Frontier Railway chuan May 21 aṭang chuan rel service hi pangngai taka tlan tir tum a nih thu an sawi a, Agartala - Sealdah (Kolkata) via Silchar, Lumding leh Guwahati-ah te a service dawn a ni. Tripura member of parliament – Jitendra Chaudhury leh Sankar Prasad Datta te chuan he Railway Mnister Suresh Prabhu chu New Delhi-ah kar kalta khan an hmu a, superfast passenger train Agartala - Kolkata leh Delhi service tir turin rawtna an thlen a ni.

Prabhu hian superfast passenger train service tur hian hmalakpui a tiam niin Chaudhury chuan a sawi. Kanchanjunga Express chu February 1 aṭang khan Silchar-Sealdah via Guwaha-ti tlan ṭan tir a lo ni tawh a, Silchar-Delhi chu February 20 aṭang khan mumal taka tlan tir a lo ni tawh bawk. Sorkar laipui chuan hmar chhak bialah hian rel kawng eng emaw zat a sial mek a, peihfel tawh tam tak a awm bawk. Heng zawngh zawng hi hmarchhakin chak zawka hma a sawn theih nana hmalakna a nih thu sorkar laipui chuana tarlang.