Manipur BJP, LJP, NCP ten ILP System thlawp

Manipur-a Inner Line Permit duh lo pawl leh political party ṭhenkhatte chuan ILP hman a nih leh theih nana hmalakna chu an thlawp thu an tarlang. BJP Manipur Pradesh, Lok Jan Shakti Party (LJP) State unit leh Nationalist Congress Party (NCP) Manipur te chuan Joint Committee on Inner Line Permit System hmalakna chu an thawp thu hi an tarlang a ni.

BJP Manipur Pradesh president hlui Th Chaoba chuan an party chuan JCILPS te thilphut chu a tir aṭanga an thlawp thu sawiin, a tawp thlenga thawp an tum thu a sawi bawk. BJP Manipur Pradesh president leh party State Election Management Committee hruaitu Thounaojam Chaoba te chuan thuchuah siamin kum 2015 August-a State Assembly-in Bill pathum a lo pass tawh sut leh a nih theih nana an hmalakna chu ropui an tih thu sawiin, an hmalakna te chu an thlawp tlat thu an sawi a ni.

BJP Manipur Pradesh president atan a thlan thar Ksh Bhavananda, Chaoba chuan Inner Line Permit System chu India danpuiin hman hnufual leh venhim ngai bik te humhiam nana siam a ni a ti ve bawk.

Bill pathum te hi MLA 60 te chuan an pass a, he mi hnu hian State Governor hnenah pek a ni a, Governor hian India President pawmpui turin a thawn ve leh a ni. Nimahsela, thal kua zet a liam hnuah pawh bill hi president chuan a la pawmpui lo. Pawl hrang hrang leh political party ṭhenkhat chuan he bill hi pass lo turin an nawr mek a, hmun tam takah lungawi lohna lantir a ni bawk.

Deputy Chief Minister Gai-khangam chuan he thil hian Congress party-ah nghawng a neih loh thu a sawi. Party State unit president TN Haokip pawhin he mi chungchanga an party hawi lam tur chu puan chhuah thui a ni ang a ti a, Imphal Municipal Corporation leh general election an hmachhawn tur chu an ngaihpawimawh thu a sawi bawk.

Lok Janashakti Party pawhin JCILPS te hmalakna an thlawp thu hi an au chhuahpui tawh a, LJP spokesperson Ningombam Ibohal chuan an party chuan a tawp thlenga JCILPS te hmalakna an thlawp tur thu leh, a theih anga ṭanpui an hreh loh thu a sawi. LJP State unit te hian August 6, 2015-a Bill pathum Assembly-in a lo pass tawh ngaihtuah hian party hruaitute chuan meeting an nei a, ILPS chungchang chu sorkar laipuiah thlen turin an rel a ni. Ningombam Ibohal chuan engvangin nge Chief Minister leh Council of Minister te hian ILPS chungchangah hi sorkar laipui-ah a thlen loh tiin na takin a sawisel a ve bawk.

Nationalist Congress Party, (NCP Manipur Unit) pawhin Joint Committee on Inner Line Permit System te hmalakna hi an thlawp niin an sawi a, NCP Manipur Unit president MLA L Ibomcha Singh chuan ILPS chungchangah hian August 11, 2012 daih tawh khan Union Minister of State Heavy Industries & Public Enterprises Praful Patel chu an hmu tih sawiin, July, 12, 2012 khan Prime Minister hnenah memorandum thehluh a ni an ti.

April 9, 2016 khan Delhi-ah State NCP president L Ibomcha Singh, MLA Praful Patel, party Rajya Sabha MP te chuan sorkar laipui an lo dawr tawh bawk a ni. He mi chungchangah hian All Naga Students’ Association, Manipur (ANSAM) pawhin thuchhuah siamin an duh loh thu an au chhuahpui ve bawk.