Manipur : Buaina chhuah hmain raltlan 2,480 hriat chhuah an ni: Biren Singh

Manipur chief minister, N. Biren Singh chuan nikum May thlaa tualchhung buaina a chhuah hma khan state cabinet hnuaia sub-committee chuan dan loa Manipur-a lo lut mi 2,480 an hriat chhuah hman thu leh, buaina chhuak avanga hna an thawh chhunzawm theih loh thu a sawi.

CM Biren Singh hian ramngaw chereu zel leh raltlante'n khua an din belh zel chungchangah press conference neiin, February 2023-a cabinet sub-committee din a nih thu te, he sub-committee-in dan loa Manipur-a lo lut, raltlante zawng chhuak tura hna an thawh thu a sawi lang a ni. Singh chuan,"Mi tu mah thlei bik kan nei lo a, dan loa lo lutte chauh kan thliar a ni. Hei hi Manipur state cabinet thutlukna a ni bawk. Chandel district-a khaw 10-ah biometric tih a ni a, heta ṭang hian dan loa lo lut mi 1,165 hriat chhuah an ni a, Tengnoupal district-a khaw 13-ah mi 1,147 hriat chhuah ni bawkin, midang pawh Churachandpur leh Kamjong-ah te hriat chhuah an ni bawk" tiin a sawi. Heng zingah hian Kamjong district-a lo lut, mi 5,457-te chhiar tel an ni lo a, mi 5,173-te biometric hi lak tawh niin, mi 329-te hi chu anmahni duh thuin an ram lamah an let leh tawh bawk a ni.

"Dan loa lo lutte zawn chhuah hi khawi lai hmun pakhat emaw chauha tih a ni lo a, Manipur pumpuia neih tura ruahman a ni. Khaw hrang hrang kan tlawh kual hnuah hriat chhuah an ni a,mahse, thla khat emaw chauh kan kalpui hnuah tualchhung buaina a chhuah chhunzawm avangin loh theih lohin tihtawp a ngai ta a ni," tiin CM Singh hian a tarlang bawk.