AP : Sex trafficking kaihhnawihah doctor leh engineer man

Arunachal Pradesh police-te chuan state leh state inkara sex trafficking kalpuite nangchingin, he sumdawnnaa inhnamhnawih mi 15 an man. Police-in an man zingah hian doctor pakhat leh engineer pahnih an tel.

Police thupuangtuin a tarlan danin, Itanagar-a mimal in, hotel anga hman pakhata sex trafficking kalpuina hmun hi luhchilhin naupang kum 10-15 inkar panga an chhanchhuak a, heng naupang zawrhnaa inhnamhnawih mi pasarih bakah a dawrtu mi pariat an man tel a, state sorkar hnuaia thawk doctor leh engineer pawh an tel a ni. Mihring hmanga sumdawnnaa inhnamhnawih an man zinga pahnih hian Itanagar-ah beauty parlour neiin, hei hi hmeichhe naupang zawrh leh hralhna hmun atan an hmang a ni.

Hmeichhe naupang an chhanchhuah zinga pahnih hi Assam-a Dhemanji-a mi an ni a, pakhat hi Arunachal Pradesh-a mi a ni. Hnu an chhuina kal zelah police-te chuan Dhemanji lam mi pahnih an la thukru tih an hriat belh a,, anni pawh chhanchhuak lehin an vaiin mi panga chhanchhuah an ni ta a ni.