Nagaland sorkarin political affairs committee a din

Nagaland sorkar chuan an state political issue chinfel kawnga hma la turin Political Affairs Committee (PAC) a din. PAC-ah hian minister-te bakah Nagaland state assembly-a political party awm zawng zawng party leader ṭheuh an tel a ni.

Nagaland chief minister, Neiphiu Rio kaihhruaina hnuaia high-level meeting neihnaah PAC hi din a nih thu state sorkar thupuangtu KG. Kenye chuan tarlangin, Nagaland-in sorkar laipui nen an inkara inremna an la neih theih loh chungchanga harsatna awmte a rang lama chinfelna atan leh inremna lailawk siam nante PAC chu a ṭangkai tur thu a sawi. "He hmalakna atan hian Legislature party leader zawng zawngte pawh an party chhung ṭheuhah Political Consultative Committee (PCC) din tura hriattir tawh an ni," tiin a sawi bawk.

India sorkar leh Nagaland-a political party hrang hrangte hian kum 1997 khan inkahhai puanna turin inremna an lo siam tawh a, hemi hnu hian party hrang hrangte nen inbiakna ṭum eng emaw zat neih tawh a ni. Sorkar laipui hian 2015 khan NSCN-IM nen framework agreement ziakin, 2017 khan Working Committee of Naga National Political Groups (WC NNPGs) nen an ṭanhmun tur ve ve chungchangah inremna an lo ziak tawh bawk a ni. October 2019 khan Naga peace talk-a sorkar laipui aiawh, RN Ravi chuan inbiakna chu a tawp tawh thu a lo puang tawh bawk. Hetih lai hian sorkar laipui chuan NSCN-IM-in flag hran neih leh Naga tana constitution hran neih an phûtna chu a la pawm thei lo thung a, WC NNPG erawh chuan sorkar laipui rawtna neihte chu an pawm thu leh an thil phut dangte chungchanga inbiakna neih leh an duh tawh zawk thu an sawi.