NIA-in Manipur police ralthuam ruk chhuahna leh Kuki laka tharum thawhnain inzawmna a nei tih tarlang

National Investigation Agency (NIA) chuan Manipur-a tharum thawhna thubuai a chhuina chargesheet chu a theh lut a, chargesheet-ah hian police ralthuam dahna hmun aṭanga ralthuam ru chhuaktute leh Manipur chhunga tharum thawhna thleng chuan inzawmna a nei tih an hmuhchhuah thu an tarlang.

NIA chargesheet hian Meitei helpawl pakhat chuan ralthuam hman dan inzirtirna hmun an siam thu a tarlang bawk. Heng thil hi tum nei rana ti an nih thu NIA chuan tarlangin, heng thilte hi Kuki-Zo mipuite beih nana ti an ni tih tarlan a ni bawk. NIA hian Meitei helpawl People’s Liberation Army (PLA) mi leh sa ralthuam hman dan zirtirtu Moirangthem Anand Singh chu thla riat liam ta khan an lo man tawh bawk. PLA hian Imphal ecological park-ah Manipur a buai ṭan tirh lam khan ralthuam hman dan inzirtirna hi an kalpui a ni.

Thawhṭannia NIA chargesheet theh luhah hian Manipur police-te'n nikum September thlaa ralthuam an man tam tak chu Imphal-a police station aṭanga ruk chhuah an ni tih forensic mithiamte'n an sawi bawk. Ralthuam an man pali zinga pathum chu sorkar hmunhma aṭanga ruk chhuah a nih thu tarlangin, heng ralthuam an ruk chhuahte hi hmang ṭangkaii,n Meitei hnam chuan Imphal-a cheng Kuki-Zo hnamte nawr chhuah nan an hmang ta a ni, a ti.