Tripura : Tui thianghlim in tur duhin Ambassa-ah kawng dang
Tripura-a Jawaharnagar mipuite chuan Thawhṭanni khan tui thianghlim in tur pek phûtin Ambassa bula National Highway an dang.
Jawaharnagar mipuite tui lakna ṭhinah hian thla thum chhung a lak theih tawh loh avangin khaw mipuite chuan lui tui thianghlim lo an tlan a ngaih phah a, hei vang hian an khuaah damlohna a tam niin an sawi. Tripura Tribal Areas Autonomous District Council hnenah an harsatna hi thlen mah se, ngaihsak an hlawh loh avangin kawngpui hi an dang ta a ni.
Tui thianghlim in tur nei lo mipuite hi Lok Sabha inthlan zawh fel a nih hunah an harsatna chinfelsak tiam ni mah se, tun thleng pawhin tui thianghlim in tur an la nei thei lo a, hei vang hian mipuite hi an lungawi lo hle. Jawaharnagar mipuite chuan an khawtlang hruaitute hnen aṭanga an harsatna tawh chhan sawi fiahna a awm lo leh, harsatna sukiang tura hmalakna a awm lo chu hriatthiam harsa an tih thu an sawi.
Jawaharnagar mipuite chuan tui thianghlim in tur neih loh vanga an harsatna tawh hrang hrangte chu thuneitute'n an duh chuan rang takin an chingfel thei niin an ngai a, thuneitute chu mipui mamawh dik tak ngaihtuahsak loa vote zawn nan chauha thutiam ṭhinah an puh bawk.