Meghalaya : India leh France sipaite'n 'SHAKTI' exercise an ṭan

India leh France sipaite intuaihriam nana buatsaih ṭhin, 'SHAKTI' exercise vawi 7-na chu Thawhṭanni aṭang khan Umroi, Meghalaya-ah neih ṭan a ni. Ram pahnih sipaite intuaihriamna hun hi kar hnih chhung awh tura ruahman niin, tun thla 26 thleng neih a ni ang.

SHAKTI exercise hawnna hun hi France palai, H.E. Thierry Mathou leh Major General Prasanna Sudhakar Joshi, General Officer Commanding 51 Sub Area-te chuan an telpui a ni. He exercise-ah hian India leh France aṭangin sipai 90 ve ve an tel a, intuaihriamna hunah hian ram pahnih sipaite hian thawhhona ṭha zawk an neih theih nan ṭan an la dawn a ni.

Tlangram hmun chhengchhe zawka chet dan leh khawpui lian vak loa chet dan chu an zir tum pawimawh tak niin heng bakah hian physical fitness, tactical drill refinement leh an chindan phung ṭha inkawhhmuhte a tel bawk ang. Tactical drill-ah hian helpawl beihna chhan let dan tur te, command post leh enthlatu dahna tur te, helipad venhim dan te, small team operations, special heliborne operations leh drone hman ṭangkai dan turte zir a ni ang.

He exercise hi kum hnih dana neih niin India leh France hian an inthlen chhawk ṭhin. SHAKTI hnuhnung ber chu kum 2021 November khan France ah neih a ni. He exercise hi India leh France sipaite tan a ṭangkai mai bakah ram pahnih inṭhian ṭhatna atan a pawimawh tel bawk.