Manipur-ah JCILPS ten lungawilohna lantir zel

Manipur-a political party eng emaw zat chuan Inner Line Permit pek phuta Joint Committee on Inner Line Permit System (JCILPS) te hmalakna chu an thlawp thu an sawi. Manipur Legislative Assembly-in August 31 2015 Anti-Tribal Bill a lo pass tawh chu duh loin JCILPS te hian kawng hrang hrangin sut leh turin sorkar an kar mek a ni. Congress leh BJP te chuan bill an thlawp thu hi an sawi thung.

Manipura rorel lai Congress party chuan he Bill hi Act a nih theih nan President of India hnenah an thawn tawh a, mahse President chuan a la pawmpui lo thung. Sorkar thuchhuah chuan he Bill hian ram leilung fate hamṭhatna a vawnhim sak zawk dawn niin a sawi.

Joint Committee on Inner Line Permit System (JCILPS) Women Wing te chu BJP State unit office leh Manipur Pradesh Congress Committee (MPCC) office tualah pungkhawmin he Bill chhungchangah hian inbiakna neih an phut. BJP te chuan sorkar lapuia an party hruaitu lawk te hnenah thlen an lo tiam a ni. JCILPS Women Wing te hi State Congress office kawtah pungkhawm lehin inbiakna neih an duh thu an au chhuahpui a ni. Lungawilohnan lantirtute hian buaina an siam lo nia hriat a ni bawk.

Hetih lai hian Joint Committee on Inner Line Permit System ten darkar 42 awh curfew an puan chu titawp a ni tawh a, mahse kawngpui dung leh hmun hrang hrangah te lungawi lohna hi an la lantir chunzawm zel a ni. JCILPS te hian mipuite hnenah ngenna siamin lungawi lohna lantir nan hian kawngpui te chu a chanve dang turin an ti. Hei bakah hian nimin aṭang khan hmun hrang hrangah sit-in-protests an neih chhunzawm leh a ni.

JCILPA hian vawi tam tak heng Bill pathum - Protection of Manipur People Bill, 2015, the Manipur Land Revenue and Land Reforms (7th amendment) Bill, 2015 leh The Manipur Shops and Establishments (Second Amendment) Bill, 2015 pass duh lohna lantir hian nawrh an huaihawt tawh a, a hlawhtlin hma loh chuan nawr zel an tum thu an sawi a ni. Manipur-a pawl hrang hrang leh political party ṭhenkhat te chuan JCILPS te hmalakna hi an thlawp thu an sawi ve bawk a ni.