Kaziranga-a ramsa ṭhenkhat ten Karbi Anglong an pan

Assam state-a Kaziranga National Park-a ramsa tam tak chuan Karbi Anglong forest an pan mek tih hriat a ni. Ramsa te hian Kaziranga National Park an chhuahsan chhan hi tui lian vang a ni a, kum tin ramsa ṭhahnem tak chuan Karbi Anglong Foprest hi an pan ṭhin a ni.

Heng ramsa te hian Karbi Anglong an pan lai hi thla lak sak an ni a, World Wild Fund for Nature-India camera trap monitoring aṭangin chiang takin a hmuh theih a ni. Chief Conservator of Forests Abhijit Rabha, Karbi Anglong Autonomous Council chuan, "Security lamah chuan heng ramsa te tan hian Kaziranga aiin Karbi Anglong forest hi a chhe zawk a ni, venhimna khauh taka kenkawh a nih ve loh avangin sapeltute an tlangnel hle a ni" a ti.

WWF-India PJ Bora pawhin ramsa te tan hian Kaziranga chu hmun him zawk a ni a ti a, Karbi Anglong Forest chu a ralmuang lo hle niin a sawi. World Wild Fund for Nature chuan Karbi Anglong leh a chhehvela cheng te chu heng ramsate himna ngaipawimawh tur hian an ngen tih a sawi. Ramsa te hian Karbi Anglong pan tur hian ramngaw enge maw zat an paltlang tih sawiin, mipuite tan harsatna an siam ngailo niin a sawi. Sorkar leh NGOs te chu heng ramsa te venhimna kawngah hian hma la turin Bora chuan a sawm bawk.

Wildlife Trust of India (WTI) Bhaskar Choudhury pawhin heng ramsa pem zingah hian Sai leh Sakei te chuan hun an duh rei tih sawiin, an himna ngaituah chu thil pawimawh tak a ni a ti. Kaziranga-ah hian ramsa te tan eitur hniang hnar a awm loh avangin Karbi Anglong forest hi an pan niin a sawi ve bawk.