Tura By-Poll PA Sangma tan kan hlan: Kohli

BJP thupuangtu Nalin Kohli chuan Tura by-poll chu India ram huap pawha politician langsar leh Meghalaya chief minister lo ni tawh ṭhin Purno Agitok Sangma tan an hlan tih a sawi.

Kohli chuan Tura by-poll-ah hian Congress chuan hnehna an chang dawn lo niin a sawi a, chu chu thil chiang tak niin a sawi. Mipuite chuan BJP party-ah rinna an nghah thu sawiin, an khingpuite aiin rinkai zawk an nih thu a sawi. Party hrang hrang te chuan campaign an nei chho mek a, hmun hrang hrangah poster te tarin hnehna chan ngei tumin hma an la chho mek zel a ni. Kohli chuan he by-election hi Meghalaya chief minister hlui PA Sangma hriatrengna atana an hman tur thu sawiin, a sulhnu ropui tak kha engtikah mah theihnghilh theih a ni dawn lo a ni, a ti bawk. National People’s Party (NPP) leh BJP te chu an thawk dun dawn a, BJP chuan candidate neiloin NPP candidate Conrad K Sangma an thawp dawn a ni.

BJP thupuangtu hian Tura chu Pathianni khan a thleng a, BJP Meghalaya unit president Shibun Lyngdoh leh party hruaitu ṭhenkhat te nen inkawmhona hun an nei nghal a ni. Kohli chuan,"By-election-a hnehna chang tur chu nitinin a chiang chho zel a, Garo hills mipuite chuan Congress-ah rinna an nghat lo a ni" a ti. Sorkar laipuiah pawh Congress party chu miten an ringlo nia sawiin, Meghalaya-a Mukul Sangma kaihhruai sorkar chu paihthlakin a awm thuai dawn tih a sawi. Kohli chuan Congress candidate Dikkanchi Shira chu mi
ṭha tak a nih thu a sawi tel zauh bawk.

Congress party-in BJP sorkar “anti-Christian” leh“anti-Muslim” tia a beihna
ṭhin chu Kohli chuan chhangin an ngaihdan an sawi a ni mai, Congress party chu a zam a ni a ti a, Mukul-a sorkar ngei pawh hi a tel a ni, a ti. BJP member ten district council-ah hnehna an chang tih sawiin, hnehna an channa hmun chu Congress candidate home constituency a ni a ti. Prime Minister Narendra Modi-a kaihhruai sorkar chuan “politics of development” a kalpui a ni a ti bawk. Meghalaya chu lalram a nilo tih sawiin, Mukul leh Dikkanchi te lal anga an awm reng hi a rem lo a, paih thlak thuai an ni ang, a ti.

NPP legislator James K Sangma chuan press conference-ah, Prime Minister Modi leh BJP party chungah lawmthu sawiin, NPP-in hma a sawn zel theih nana an thlawp chu thil chhinchhiahtlak tak a ni a ti. Hetih lai hian Tribal Affairs Minister Jual Oram pawhin NPP candidate Conrad K Sangma tana a campaign tur thu a sawi ve bawk. Heng bakah hian BJP Party hruaitu lawk Kiren Rijiju leh Assam chief ministerial candidate Sarbananda Sonowal te pawhin Conrad an thlawp thu an sawi a ni.

Meghalaya Chief Minister, Dr Mukul Sangma-an election rally Dagal Apal-a thu a sawinaah National People’s Party (NPP) candidate Conrad K. Sangma chu beiin, Conrad hian na takin a chhang let ve nghal. MP candidate chuan Conrad power project chu private company kutah hlan a duh tih sawiin, state sorkar chuan a dodal a ni a ti a, state-in power project a ngaipawimawh tak tak a nih chuan Central Power Porporation NEEPCO leh NTPC kutah a dah mai loh a ti. Hetih lai hian Congress party chuan Conrad chu Congress sorkar hmingṭhatna thup a, mimal hnena hlan duhtu niin an puh ve bawk.