Tripura-in Sorkar laipuiah rawtna thlen

Tripura sorkar chuan sorkar laipuiah rawtna siamin Tripura rail network chu Myanmar nena thlun zawm turin an duh tih an sawi. An rawtna hi External Affairs Minister Sushma Swaraj leh Railways Minister Suresh Prabhu hnenah an thlen a ni.

Tripura Transport Minister Manik Dey chuan Tripura chu Trans Asian Network nen thlunzawm ni thei se an duh tih sawiin, chu chuan hmasawnna nasa tak a then thei niin a sawi. Rawtna an thlenah hian Tripura leh Myanmar inkar chu Mizoram kaltlangin km 257 ani tih an tarlang a, rel kawng hi siam a nih chuan awlsam takin Thailand, Singapore leh Malaysia te nen insumdawn tawnna a kalpui theih dawn a ni, an ti.

Sorkar laipui chuan Akhaura-Agartala rel kawng zauh hna thawh mekah ram neitute hnenah zangna dawmna cheng vaibelchhe 98 a pe chhuak tawh a ni. Tunah hian passenger phur rel chu Silchar - Agartala inkarah service tir mek a ni a, Assam Assembly election zawhfel a nih hnuah official-a hawn a ni ang.