DoNER minister-in Hri leng do kawngah hmarchhak state-te a fak
Union DoNER (Development of North Eastern Region) Minister Jitendra Singh chuan Covid-19 leng mek dona kawnga hmarchhak state hrang hrangte hmalakna a fak.
Nilainia Meghalaya health minister AL Hek nen an inkawmnaah DoNER minister chuan hei hi sorkarin, hri leng dona kawnga hmarchhak state sorkarte bakah civil socieity hrang hrangte hmalakna chu fakawm a tih thu a sawi a ni.
Union minister chuan hri leng vanga ram puma lockdown hmasa ber puan a nih chhung khan hmarchhak state pariat zinga panga-ah Covid-19 kai an la awm lo a, hmun danga tangkhangte an haw ṭan hnuah hri kai hi hmuh an ni ve chauh a ni, a ti. DoNER ministry chuan lockdown hmain hri leng dona atana hmarchhak state te tan cheng vaibelchhe 25 a pe a, state sorkar hrang hrangte pawhin hei hi ṭangkai takin an hmang a ni, a ti.
Prime minister Narendra Modi thurawn angin, hmar chhak state bakah Jammu and Kashmir leh Ladakh-ahte oxygen ṭhahnem tak supply lawk a ni a, hri kai enkawl tur an pun chhoh hnuah pawh heng hmunahte hian oxygen indaihlohna avanga harsatna thleng a awm lo a ni, tiin Singh chuan a sawi.