JCILPS ten nawrh chhunzawm zel

Manipur-a political party ṭhenkhat leh Joint Committee on Inner Line Permit System (JCILPS) ten sorkar laipui hnenah ILP system chu an state-ah hman a nih zel theih nana sorkar an nawrna chu kalpui zel a ni.

JCILPS hruaitu Khomdram Ratan chuan an hmalakna chu mipui leh political party ṭhenkhatten an thlawp ṭhat thu sawiin, a tawp thlenga beih an tum thu a sawi. State sorkar chu Imphal Municipal Corpoaration election June thlaa neih tur chu hmang ṭangkai a, sorkar laipui kar nana hmang turin kan ngen a ni, a ti. Ratan chuan a ṭul a nih chuan torch rally bakah a ṭul dan anga nawr chhunzawm zel an tum thu a sawi bawk.

JCILPS te hian nimin khan lungawi lohna lan tirin Sagolband-Keithelmanbi kawngpui chu darkar hnih chhung an dang a ni. Hetiang bawk hian vawiin lamah chhunzawm leh an thu thu JCILPS hruitute chuan an sawi a, Konungmamang - Irilbung, Keishampat - Hiyangthang inkar kawngpui te chu dan an tum a ni. May 14-a Moirangkhom - Lilong Bridge, May 15-ah Minu-thong - Yaingangpokpi, May 16 Ching-meirong - Khonghampat, May 17 leh 18-ah te Keishamthong - Malom kawngpui dan tumin ruahmanna an siam mek bawk.

ILP phutna sorkar nawrnaah hian women wing te chu a phusa ber zingah telin, 100 chuang vel zet te chuan Imphal-Kangchup inkarah lungawi lohna lantirin kawng dungah an thu a ni. Kawngpui dangtute hian school van, medical, media, tui phur, kohhran programme leh tul bik te chu an kaltlang tir. Kongba, Singjamei, Thangmeiband, Konung Mamang, Wangkhei, Uripok, Sagolband , Salam Leikai, Checkon leh hmun dang dangah lungawi lohna hi kantir a ni bawk. JCILPS women wing hruaitute chuan Manipur Legislative Assem-bly-a MLA hmeichhe pathum te chu an hmalakna thlawp tur hian an phut tih sawiin, tun thlenga an thlawpna an la lantir lo chu mak an tih thu an sawi.

Hetih lai hian Joint Action Committee te pawhin Anti-Tribal Bill duh lohna lan tirin Manipura Tribal te chenna hmunah May 15 zan lai aṭang khan lungawi lohna darkar 24 awh an lantir.

JAC te hian Thawhlehni khan thuchhuah an siam nghal a, chief minister O Ibobi kaihhruai sorkar chuan Inner Line Permit System chu a ngaihthah a ni an ti a, hma la tura an phut thu an sawi. State sorkar hnenah hian November 9, 2015 leh January 11, 2016 khan JAC te hian an harsatna hi an lo thlen tawh a, mahsestate sorkar hian a ngaihthah niin an sawi.