Manipur zirlai pawlin ADC inthlan buatsaih phut

All Tribal Students’ Union Manipur (ATSUM) chuan Autono­mous District Council (ADC)  term pawhsei tumna chu duh loin, ADC hi ṭhiat a, inthlan buatsaih an phut. 

Imphal-a ATSUM leh a hnuaia unit hrang hrangten joint meeting an neihah, state sorkar chu ADC chairman-ten an term thla ruk dang atana pawhsei an tum chu ngaihtuah ṭha tura an phut thu an sawi. 

ATSUM information and publicity secretary Khaiminlen Doungel chuan Hills Areas Committee (HAC) chuan fur lai a nih avangin inthlan buatsaih a buaithlak tiin, state sorkar hnenah Manipur Hills District-a ADC paruka inthlan neih hun tur chu titlai turin an ngen a ni, a ti. He an ngenna hi state cabinet chuan ngaihtuah chiang loin an lo pawmsak niin zirlai pawl chuan an sawi bawk.

Term pawhsei diltu hi ADC pali - Ukhrul, Chandel, Tamenglong leh Kangpoksi district-a chairperson-te an ni a, ADC member-te term hi thla ruk pawhsei turin an dil a ni. ATSUM chuan term pawhsei an dilna chhan hi hma an sial vang leh, hlawkna tel an tum vang a ni, an ti.