IPFT-in October 15-ah bandh huaihawt dawn

Tripura-a rorellai, BJP thawhpui Indigenous People’s Front of Tripura (IPFT) chuan an thil phut hrang hrang tihlawhtling tura sorkar nawr nan October 15 hian Tripura Tribal Areas Autonomous District Coun­cil (TTAADC) area huam chhungah darkar 24 awh bandh huaihawt an tum. 

Agartala Press Club-a press conference an neiha, IPFT assistant general sec­retary Mangal Debbara chuan IPFT central executive committee meeting vawi 13-na an neihah bandh huaihawt hi an rel tih a sawi. 

IPFT in an thil phut zingah hian Tipraland state hran siam te,  High Power Modality Committee on Tribal Welfare report kimchang puanzar te, ADC thuam chakna atana Parliament-a 125th Constitution siamte a tel. 

Party general secretary kaihhruaiin MLA palite chu New Delhi-ah kalin, sorkar laipui hotute dawr an tum a, Prime Minister, Union home minister leh BJP national president JP Nadda-te an hmu dawn a ni. 

Tripura-ah hian BJP-IPFT ṭangrual sorkar a ding mek a, seat 60 awmna Legislative Assembly-ah BJP hian seat 36 neiin IPFT hian seat riat a nei a ni. Eptu paty lian ber CPI-M chuan MLA 16 a nei bawk.